ਜਲੰਧਰ – ਸ਼ਾਂਤੀ ਵਿਹਾਰ ਵਿਚ ਬੀਤੇ ਦਿਨੀਂ ਦੁਪਹਿਰ ਵੇਲੇ ਨਸ਼ੇ ਦੀ ਹਾਲਤ ਵਿਚ ਸ਼ਰਾਬ ਦੀ ਬੋਤਲ ਨੂੰ ਕਾਰ ਦੀ ਛੱਤ ’ਤੇ ਰੱਖ ਕੇ ਫਰੂਟ ਵਾਲੇ ਅਤੇ ਪੀ. ਸੀ. ਆਰ. ਕਰਮਚਾਰੀ ਨਾਲ ਝਗੜਾ ਕਰਨ ਵਾਲੇ ਪੀ. ਏ. ਪੀ. ਦੇ ਏ. ਐੱਸ. ਆਈ. ਰਸ਼ਪਾਲ ਸਿੰਘ ਦੀ ਥਾਣਾ ਨੰ. 1 ਦੀ ਪੁਲਸ ਨੇ ਗ੍ਰਿਫ਼ਤਾਰੀ ਪਾ ਲਈ ਹੈ। ਏ. ਐੱਸ. ਆਈ. ਰਸ਼ਪਾਲ ਸਿੰਘ ਦੀ ਇਸ ਕਰਤੂਤ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਪੁਲਸ ਮਹਿਕਮਾ ਕਾਫ਼ੀ ਸ਼ਰਮਿੰਦਾ ਹੋਇਅ ਸੀ, ਜਿਸ ਨੂੰ ਲੈ ਕੇ ਕਮਿਸ਼ਨਰੇਟ ਪੁਲਸ ਨੇ ਗੰਭੀਰਤਾ ਵਿਖਾਉਂਦੇ ਹੋਏ ਪੀ. ਸੀ. ਆਰ. ਦੇ ਏ. ਐੱਸ. ਆਈ. ਪਿਆਰਾ ਸਿੰਘ ਦੇ ਬਿਆਨਾਂ ’ਤੇ ਰਸ਼ਪਾਲ ਸਿੰਘ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।
ਰਸ਼ਪਾਲ ਦੇ ਮੈਡੀਕਲ ਵਿਚ ਐਲਕੋਹਲ ਵੀ ਆਇਆ ਹੈ। ਥਾਣਾ 1 ਦੇ ਇੰਚਾਰਜ ਰਾਜੇਸ਼ ਸ਼ਰਮਾ ਨੇ ਦੱਸਿਆ ਕਿ ਐਤਵਾਰ ਨੂੰ ਰਸ਼ਪਾਲ ਸਿੰਘ ਖ਼ਿਲਾਫ਼ ਕੇਸ ਦਰਜ ਕਰਕੇ ਉਸ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਹ ਗੱਲ ਵੀ ਸਾਹਮਣੇ ਆਈ ਹੈ ਕਿ ਇਸ ਤੋਂ ਪਹਿਲਾਂ ਵੀ ਉਹ ਸ਼ਰਾਬ ਪੀ ਕੇ ਇਲਾਕੇ ਵਿਚ ਰਹਿਣ ਵਾਲੇ ਲੋਕਾਂ ਨਾਲ ਝਗੜਾ ਕਰਦਾ ਸੀ, ਜਿਸ ਨੂੰ ਲੈ ਕੇ ਥਾਣੇ ਵਿਚ ਸ਼ਿਕਾਇਤਾਂ ਵੀ ਆਈਆਂ ਪਰ ਹਰ ਵਾਰ ਉਸ ਦਾ ਰਾਜ਼ੀਨਾਮਾ ਹੋ ਜਾਂਦਾ ਰਿਹਾ।
